मळगाव पंचायतन देवस्थानची तरंगकाठी ग्रामस्थांच्या भेटीला
मळगाव पंचायतन देवस्थानची तरंगकाठी ग्रामस्थांच्या भेटीला
गावात सर्वत्र चैतन्याचे व भक्तीचे वातावरण
परंपरेचा वारसा जपत तरंगकाठीचे घरोघरी विधीवत व भक्तिभावाने पूजन
सावंतवाडी :
देव भावाचा भुकेला भक्तांसाठी धाऊनी आला याची प्रचिती येते ती मळगाव गावात. मळगाव पंचायतन देवस्थानची तरंगकाठी पुर्वचारी देवाच्या उत्सव मुर्तीसह मळगाव ग्रामस्थांच्या भेटीसाठी गावात घरोघरी फिरविण्यात येत आहे. या कार्यक्रमाला सोमवार १७ नोव्हेंबरपासून सुरुवात झाली असून या कार्यक्रमामुळे गावात सर्वत्र चैतन्याचे व भक्तीचे वातावरण निर्माण झाले आहे. घरी आलेल्या तरंगकाठीचे प्रत्येक घरोघरी पारंपरिक रितीरिवाजाप्रमाणे विधीवत व भक्तिभावाने पूजन करण्यात येत आहे.
मळगाव गाव आगळ्या वेगळ्या परंपरा जोपासण्यासाठी ओळखला जातो. अशीच एक आगळी वेगळी परंपरा म्हणजे
मळगाव पंचायतन देवस्थानची तरंगकाठी मळगाव ग्रामस्थांच्या भेटीसाठी घरोघरी फिरविण्यात येत आहे. मळगाव-सोनुर्ली देवस्थानचा सोनुर्ली माऊली जत्रोत्सब पार पडल्यानंतर मळगाव गावात पंचायतन देवस्थानची तरंगकाठी घरोघरी फिरविण्याची प्रथा गेल्या कित्येक वर्षापासून चालत आली आहे. तत्पूर्वी ही तरंगकाठी मळगाव व सोनुर्ली देवस्थान एक असल्याने मळगाव येथील रवळनाथ जत्रोत्सव झाल्यावर सोनुर्ली जत्रोत्सवासाठी नेली जाते. तरंगकाठी व पालखी जत्रोत्सवानंतर सोनुर्ली येथे पाहुणचारासाठी थांबते. तेथे पाहुणचार झाल्यावर सोनुर्ली येथे मळगाव गावचे राऊळ व गावकर आदी मानकरी जातात. तेथे कौलप्रसाद घेऊन पंचायतन मळगावला घेऊन आल्यावर तरंगकाठी मळगावात घरोघरी फिरविली जाते. यावेळी गावातील गोसावी मठालाही भेट देण्यात येते. यासाठी सुमारे पंधरा ते वीस दिवसांचा कालावधी लागतो. दरवर्षीप्रमाणे यंदाही सोमवारपासून (१७ नोव्हेंबर) कुळघराकडून विधिवत तरंगकाठी व पालखीचे पूजन झाल्यावर ढोलांच्या गजरात मानकऱ्यांच्या उपस्थितीत गावचे मानकरी सावंत यांच्या घरापासून तरंगकाठी फिरविण्यास सुरुवात झाली. त्यानंतर पाडगावकर, जोशी आदी मानकऱ्यांजवळ तरंगकाठी फिरवून बाकी गावात तरंगकाठी फिरविण्यास सुरुवात करण्यात आली. यावेळी घरातील व्यक्तींनी गंध, पुष्प वाहून तरंगकाठीचे विधीवत पूजन केले. तसेच देवीची ओटी भरण्यात आली. यावेळी काही ठिकाणी सुवासिनींनी तसेच नवीन लग्न झालेल्या महिलांनी देवीस साडी अर्पण करुन नवसफेड केली. या सोहळ्यात घरातील मोठ्यांसह लहान मुलेही सहभागी झाली होती.
शुक्रवारपासून मळगाव गावची मांजरी बसत असल्याने या कालावधीत गावातील सर्वच धार्मिक कार्य बंद असतात. त्यामुळे उर्वरित गावात मांजरी संपून मायापूर्वचारी व भूतनाथ जत्रोत्सव झाल्यावर तरंगकाठी फिरविण्यात येणार आहे. अशाप्रकारे तरंगकाठीची असंख्य वर्षांची ही परंपरा मळगाव गावचे मानकरी एकोप्याने जोपासत आले आहेत.
