सावंतवाडी नगरपरिषद निवडणूक: माजी आ. वैभव नाईक यांची माजी राज्यमंत्री प्रवीणभाई भोसले यांच्या घरी सदिच्छा भेट!
सावंतवाडी नगरपरिषद निवडणूक: माजी आ. वैभव नाईक यांची माजी राज्यमंत्री प्रवीणभाई भोसले यांच्या घरी सदिच्छा भेट!
सावंतवाडी:
आगामी सावंतवाडी नगरपरिषद निवडणुकीच्या पार्श्वभूमीवर राजकीय वातावरण तापू लागले आहे. या अनुषंगाने, माजी राज्यमंत्री प्रवीणभाई भोसले यांच्या निवासस्थानी माजी आमदार वैभव नाईक यांनी नुकतीच सदिच्छा भेट घेतली. या भेटीमुळे राजकीय वर्तुळात चर्चेला उधाण आले आहे.
शिवसेनेतील (उबाठा) महत्त्वाचे नेते असलेले आ. वैभव नाईक यांनी प्रवीणभाई भोसले यांच्या घरी भेट घेऊन त्यांच्याशी महत्त्वपूर्ण चर्चा केली. ही भेट मुख्यत्वे नगरपरिषद निवडणुकीच्या प्रचार नियोजनासंदर्भात आणि स्थानिक पातळीवरील राजकीय स्थितीचा आढावा घेण्यासाठी असल्याचे बोलले जात आहे.या महत्त्वाच्या भेटीप्रसंगी उद्धव बाळासाहेब ठाकरे शिवसेना (उबाठा) सावंतवाडी विधानसभा प्रमुख रुपेश राऊळ यांच्यासह अन्य मान्यवर पदाधिकारी व कार्यकर्ते उपस्थित होते.
माजी राज्यमंत्री प्रवीणभाई भोसले यांचा सावंतवाडी तालुक्याच्या राजकारणावर मोठा प्रभाव आहे. या पार्श्वभूमीवर, आमदार वैभव नाईक आणि प्रवीणभाई भोसले यांच्यातील चर्चा नगरपरिषद निवडणुकीतील रणनीती आणि मतदारांपर्यंत पोहोचण्याचे नियोजन यावर केंद्रित होती. सावंतवाडी शहराच्या विकासाचे मुद्दे व उमेदवारांना निवडून आणण्यासाठीच्या उपाययोजनांवर यावेळी विचारमंथन झाले .
या दोन प्रमुख नेत्यांच्या भेटीमुळे सावंतवाडी नगरपरिषद निवडणुकीतील राजकीय समीकरणांना नवी दिशा मिळण्याची चिन्हे आहेत. प्रवीणभाई भोसले यांचा अनुभव आणि आमदार वैभव नाईक यांचे संघटनात्मक कौशल्य या निवडणुकीत महाविकास आघाडीसाठी निर्णायक ठरू शकते,या महत्त्वपूर्ण भेटीनंतर सावंतवाडीच्या नागरिकांमध्ये तसेच राजकीय वर्तुळात उत्सुकता वाढली आहे. निवडणुकीच्या पुढील टप्प्यात काय घडते, याकडे सर्वांचे लक्ष लागले आहे.
