रायगड: अनधिकृत LED मासेमारीवर मत्स्यव्यवसाय विभागाचा ‘सर्जिकल स्ट्राईक’; तीन नौकांवर मोठी कारवाई
रायगड: अनधिकृत LED मासेमारीवर मत्स्यव्यवसाय विभागाचा ‘सर्जिकल स्ट्राईक’; तीन नौकांवर मोठी कारवाई
रायगड:
महाराष्ट्र राज्याच्या सागरी हद्दीत शासनाने बंदी घातलेल्या LED दिव्यांचा वापर करून मासेमारी करणाऱ्यांवर मत्स्यव्यवसाय विभागाने मोठी कारवाई केली आहे. १७ आणि १८ डिसेंबर रोजी राबविलेल्या गस्ती मोहिमेदरम्यान रायगड जिल्ह्यातील तीन मासेमारी नौका पकडण्यात आल्या असून, त्यांच्याकडील लाखो रुपयांचे साहित्य जप्त करण्यात आले आहे.
गस्ती दरम्यान ‘अशा’ पकडल्या नौका
मत्स्यव्यवसाय विभागाच्या गस्ती नौकेने समुद्रामध्ये ‘दहाड सत्र’ राबवून ही कारवाई केली. यामध्ये खालील नौकांचा समावेश आहे:
- साई गणेश (पनवेल): १७ डिसेंबर रोजी रात्री ९:३० वाजता खदेरी समोरील समुद्रात १० वाव खोल पाण्यात अनधिकृत LED मासेमारी करताना ही नौका पकडली गेली. याचे मालक श्री. जगन्नाथ माया कोळी (केळवणे) आहेत.
- हेरंब कृपा (अलिबाग): १७ डिसेंबर रोजीच रात्री ११:०० वाजता अलिबाग समोरील समुद्रात १२ वाव पाण्यात ही नौका LED सह मासेमारी करताना आढळली. ही नौका साखरकोळीवाडा येथील श्री. यशवंत गणपत नाखवा यांच्या मालकीची आहे.
- श्री समर्थ कृपा (उरण): १८ डिसेंबर रोजी सकाळी ६:०० वाजता करंजा येथील श्री. प्रकाश तुकाराम पाटील यांच्या नौकेची तपासणी केली असता, त्यात मोठ्या प्रमाणात LED साहित्य सापडले.
जप्त करण्यात आलेले साहित्य
‘श्री समर्थ कृपा’ या नौकेतून जप्त करण्यात आलेल्या साहित्याची व्याप्ती मोठी आहे: - ४००० वॅटचे अंडर वॉटर LED लाईट – ४ नग
- ३००० वॅटचे अंडर वॉटर LED लाईट – ३ नग
- २५०० वॅटचे अंडर वॉटर LED लाईट – १ नग
- सीया लाईट (१००० वॅट) – १६ नग
- हॅलोजन बल्ब (४०० वॅट) – २ नग
- जनरेटर – १ संच
वरिष्ठ अधिकाऱ्यांच्या उपस्थितीत कारवाई
ही धडक कारवाई सहआयुक्त (सागरी) श्री. महेश देवरे आणि प्रादेशिक उपायुक्त श्री. नागनाथ भादुले यांच्या मार्गदर्शनाखाली करण्यात आली.
यावेळी ससून गोदी, करंजा, मिरकरवाडा आणि साखरीनाटे येथील परवाना अधिकारी उपस्थित होते.
मत्स्यव्यवसाय विभागाने जप्त केलेल्या नौका आणि साहित्यावर कायदेशीर प्रक्रिया सुरू केली असून, अनधिकृत मासेमारी करणाऱ्यांना हा कडक इशारा मानला जात आहे.
