​सावंतवाडी शाखेच्या अमृत महोत्सवी वर्षपूर्तीनिमित्त रविवारी रंगणार इस्कॉनची ‘भजनसंध्या’!प.पू. लोकनाथ स्वामी महाराजांचे होणार शुभागमन

​सावंतवाडी । प्रतिनिधी :
आंतरराष्ट्रीय कृष्णभावनांमृत संघ अर्थात इस्कॉन सावंतवाडी शाखेच्या वतीने रविवार, २१ डिसेंबर रोजी शहरात भव्य ‘भजनसंध्या’ कार्यक्रमाचे आयोजन करण्यात आले आहे. राणी पार्वतीदेवी हायस्कूलच्या सभागृहात सायंकाळी ५ ते रात्री ९ या वेळेत हा सोहळा रंगणार असून, यानिमित्ताने कोकणवासीयांना आध्यात्मिक विचारांची मोठी मेजवानी मिळणार आहे.
​ ​या सोहळ्याचे मुख्य आकर्षण म्हणजे इस्कॉनचे जगद्विख्यात गुरु महाराज प.पू. लोकनाथ स्वामी महाराज आणि अमेरिकन संन्यासी प.पू. श्रीकृष्ण चैतन्य स्वामी महाराज यांची उपस्थिती हे असणार आहे. यावेळी दोन्ही महाराजांची प्रवचने होणार असून, नोएडा येथील श्रीमान सुबल गोपाल प्रभू यांचे सुश्राव्य कीर्तन होईल. याशिवाय भजन, कीर्तन आणि विशेष नाटिकेचे सादरीकरण केले जाणार असून, कार्यक्रमाची सांगता ‘महाप्रसादाने’ होणार आहे.
​ ​या कार्यक्रमाच्या नियोजनाबाबत माहिती देण्यासाठी आयोजित पत्रकार परिषदेत इस्कॉनचे शाखा प्रमुख सहस्त्रनाम प्रभूजी, सावंतवाडी शाखा अध्यक्ष विजय राऊळ, व्हाईस चेअरमन प्रकाश रेडकर, सचिव राजेश वाडकर, सदस्य उदय भराडी आणि देवकीपुत्र प्रभूजी उपस्थित होते. यावेळी विजय राऊळ म्हणाले की, “प.पू. लोकनाथ स्वामी महाराजांनी भारतात २५ हून अधिक मंदिरे उभारली असून पंढरपूर येथेही मोठे सेवाकार्य सुरू आहे. इस्कॉन संस्था जगभरातील १५० पेक्षा जास्त देशांत भागवत धर्म आणि भगवद्गीतेचा प्रचार करत आहे.”
​ ​सावंतवाडी शाखेला यावर्षी २५ वर्षे पूर्ण होत आहेत, त्यानिमित्ताने विविध उपक्रम राबवले जात आहेत. लवकरच सावंतवाडीतील शाळांमध्ये भगवद्गीतेवर आधारित परीक्षेचे आयोजन केले जाणार असल्याची माहितीही यावेळी देण्यात आली. “मानवी जीवनात भक्तीचे महत्त्व अनन्यसाधारण आहे. व्यक्तीची चेतना बदलण्याचे कार्य भक्तीद्वारे घडते. मनुष्य जन्म आणि जीवन पूर्णतृप्त कसे करावे, याचे मार्गदर्शन या भजनसंध्येच्या माध्यमातून केले जाईल,” असे प्रतिपादन सहस्त्रनाम प्रभूजी यांनी केले.
​सावंतवाडी आणि परिसरातील भाविकांनी या आध्यात्मिक सोहळ्याचा आणि महाप्रसादाचा लाभ घ्यावा, असे आवाहन इस्कॉन सावंतवाडी व्यवस्थापन समितीच्या वतीने करण्यात आले आहे.